මල්ලි බබාගෙ බයිසිකල් වික්‍රමය..!!

සුදු පුතා... මොනවද ඔය කරන්නෙ.. අනුංගෙ බයිසිකල්වල වඩුකං නෑ ඔයාට.. මෙහෙ එන්ඩ.. ඇඟ හෝදවන්ඩ.

ඉස‍්කෝලෙ ඇරිල ආව ගමන් ජනූ බබාගෙ සුදු ගවුමයි මල්ලිබබාගෙ ඇඳුම් ටිකයි තව දවස ගා‍නෙ එකතු වෙන අනිත් ඇඳුම් කන්දයි අරන් මිදුලෙ ලිඳ ලඟට එන ගමන් අම්ම මල්ලි බබාට සැර දැම්ම. 

ඔය කාලෙ වෙද්දි මල්ලි බබා චූටිම චූටියි ඉතිං.. මොන්ටිසෝරියෙ.. ජනූ බබා නං  දෙක වසරෙද කොහෙද.

ඉස්කෝලෙ ඇරිල අම්ම  එක්ක ගෙදර ආව ගමන් මල්ලි බබා කරන්නෙ ඇඳුං සේරම ගලවල දා‍ල පිලිකන්නට දුවන එක තමයි.

ඇයි දන්නවද? 

අපේ ගෙදර තියෙන්නෙ පාර අයිනෙනෙ.. ඉතිං ගම ඇතුළෙ ඉඳල පාරට එන කට්ටිය පාර එයාලගෙ බයිසිකල් සේරම අපේ ගෙයි පිලිකන්නෙ බිත්තියට හේත්තු කරල තමයි ගමන යන්නෙ. උදේට ඉස්කෝලෙ යන ළමයි, කොළඹ වැඩට යන මාමල .. 

කොහොම හරි බයිසිකල් හතරක් පහක් ජනූ බබාලගෙ බිත්තිය අයිනෙ හේත්තුව දාගෙන ඉන්නව හැමදාම... 

අම්ම කොච්චර එපා කිව්වත් මල්ලිබබා උණ බම්බු කඩුල්ලෙන් උඩිං පැනල ඉස්සෙල්ලාම යන්නෙ පිලිකන්නට.. ගිහින් බලන්නෙ බයිසිකල් කීයක් නවත්තලද කියල තමයි.

හතරක් පහක් නවත්තල තියෙනව කියන්නෙ ඉතිං මල්ලි බබාට අවුරුදු ලැබුව වගේ තමයි.. 

ඉතිං මොන්ටිසෝරි යන චූටි මල්ලි බබාට මොකද්ද මේ බයිසිකල් එක්ක තියෙන ගනුදෙනුව??

නෑ නෑ.. එයාට පුලුවනෑ ඔය ලොකු බයිසිකල් පදින්ඩ.. කොටිංම එයාට සපෝටර් හයිකරල තිබුණ ජනූගෙ චොපර් බයික් එකට නැගගන්නවත් බෑ ඒ කාලෙ.. ජනූ තමයි මල්ලි  බබාව උස්සල ඒකෙ තියල එයාව පද්දවන්නෙ ..

එයාට ඒ කාලෙ තිබුණෙ චූටි ට්‍රයිසිකලයක්.. අර හැන්ඩ්ල් එක කෙළවරේ ඉටි රැල් එල්ලෙන ට්‍රයිසිකලයක්..

එයා අර පිලිකන්නට යන්නෙ අර නවත්තල යන බයිසිකල්වල පැඩ්ල් කරකවන්ඩ..

ඔය සමහර බයිසිකල්වල චේන් එක හරි තදයි..ඉතිං  පැඩ්ල් කැරකෙන්නෙ නෑ ලේසියෙන්..

අනික චූටි මල්ලි බබාට හයිය තියෙනවද ඕව කරකවන්ඩ..?  

සමහර වෙලාවට ජනූ බබාට හිනත් යනව මල්ලි බබා දත්මිටි කාගෙන තොල් විකාගෙන, කෙඳිරි ගාගෙන අර බයිසිකලේ එක අතකින් අල්ලගෙන පැඩ්ල් එක අනිත් අතින් කරකවන හැටි දැක්කම.. 

ඊට පස්සෙ හැන්දෑවට නිදාගන්න ගියාම එයාට ලෙඩ තියෙනව මුලු සරුවාංගෙම. 

පුතාගෙ චූටි කකු‍ල රිදෙනව, පුතාගෙ චූටි අත රිදෙනව... මේ.. පුතාගෙ චූටි ඇඟිල්ල මොකෙද්ද කාල!!

ඔන්න ඔහොම තමයි එයා  එයාගෙ ලෙඩ අම්මට රිපෝට් කරන්නෙ

අම්මත් ඉතිං කෝ බලන්ඩ සුදු පුතාගෙ චූටි අත කියල ලෙඩ බලනව..

ජනු බබාට ඉතිං සමහර වෙලාවට ඉරිසියත් එක්කල.. 

ඉතිං කො‍හොම හරි දැං ජනූ ළමය කියාගෙන ආවෙ ඒ කතාව නෙවෙයිනෙ..

ඔන්න දැං මේ කියන දවසෙත් අම්ම ඇඟ හෝදන්න කතා කරන එක නෑහෙන ගාණට මල්ලි බබා ඉන්නව. 

වෙලාවට එයාට අද හම්බෙලා තියෙන බයිසිකලේ පැඩ්ල් එක කැරකෙනව නිකං කිසි කිසි ගාල...

මෙයත් දාගෙන කරකවනව...අර හුළඟට කැරකෙන පොල්කොළ බඹරෙ වගේ!

ජනූ අම්ම රෙදි ටික හෝදන්ඩ කලින් ජනූට පුරවල දුන්න වතුර බේසමෙන් ඇඟ හෝදගෙන ගවුමක් දාගත්ත. 

මල්ලිව හෝදවන්ඩ එක්ක එන්ඩ පුතේ..

අම්ම රෙදිවල සබන් ගගා බේරමට පුරවන ගමන් ජනූට කිව්ව.

සමහර දාට ඉතිං අම්ම රෙදි හෝදන අතරෙ ජනූ මල්ලි බබාව හෝදවනව.. හැබැයි ඒකට මල්ලි බබා එච්චර කැමති නෑ.. 

අම්මට උදව් වෙන්න කොච්චර ආස වුණත් මල්ලි බබාව නාවන්න ජනූ බබා ආසත් නෑ.. ඇයි බැරි වෙලාවත් එයාගෙ ඇස්වල සබං චුට්ටක් හරි ගෑවුනොත්  එහෙම විලාප තියනවනෙ  මුලු ගමටම ඇහෙන ගානට..

ඉතිං අම්මට රෙදි ගොඩාරියක් හෝදන්න තියෙද්දි අම්මට මල්ලි බබාව හෝදවල දෙනව කියන්නෙත් ලොකු උදව්වක් නෙ..  ඒ හන්ද ජනූ ගියා මල්ලි බබාව එක්කන් එන්න

එන්ඩ යන්ඩ  ඔයාගෙ ඇඟ හෝදවන්න.. ජනූ කතා කළා

බෑ..

මල්ලි බබා ජනූ දිහාට හැරෙන්නෙත් නැතුව තනි වචනෙන් උත්තර දුන්න. එයා පැඩ්ල් එක කරකවන අත නං තප්පරේකට නැවතුනේ නෑ 

අන්න..... අම්ම එන්න කිව්ව ඔයාට ඇඟ හෝදවන්න...

මං ආයෙත් කතා කළා.. 

බෑ කිව්වනෙ..  ඒ පාර මල්ලි බබා ජනූ දිහාට හැරිලම සැර දැම්ම..

අපෝ මෙයාගෙ ගණන්!! හැටි විතරක් හෙලුකොට්ටගෙ.... 

ජනූ බබාට ඉතිං තරහ ගිය පාර මොනවත් කිව්වෙ නැති වුණාට හිතුණෙ නං එහෙම තමයි ඔන්න.

අම්මේ......... මෙන්න මල්ලි එන්න බෑ කියනෝ!!! ජනූ බබා ඉතිං අන්තිම තුරුම්පු කොලේ විසි කළා...

හා බැයි නං ඉන්ඩ දෙන්ඩ පුතේ.. මං මේ ටික ඉවර වුණාම එයාව හෝදවන්නං.. 

ඒ පාර ජනූ ආපහු ඇවිල්ල අම්ම අතුල්ලල දෙන රෙදි ටික හෙමින් සැරේ වතුර බේසමේ එබුව.. 

ජනූ බබා ඉතිං ලිං බැම්ම තරං වත් උස නෑනෙ  ඒ කාලෙ..  ඒ හන්ද වතුර ඇදල දෙන්න  විදියක් නෑ අම්මට. 

ඉතිං පන්තියෙ වෙච්ච දේවල් කිය කියා ජනූ අම්මට පුලුවන් විදියට උදව් කළා රෙදි හෝදන වැඩේට.. 

ආච්චි අම්මත් තිප්පපොත්තෙ ගිහින් හන්ද ගෙදර පාලුයි.. 

අත්තත් පල්ලෙහා ඇත්තෙ වැටවල් හදන්න ගිහින්.. තාත්ත එද්දි ඉතිං රෑ වෙනවනෙ.. 

පුතේ මල්ලිව සැරෙන් සැරේ බලන්ඩ.. මක් කරනවද දන්නෙ නෑනෙ..

අම්ම ජනූව සැරෙන් සැරේ යැව්ව මල්ලි බබාගෙ වැඩ සත පහකට විස්වාස නැති හන්ද..  

ඒ යන යන සැරේට මල්ලි බබා ඉන්නව ඉතිං අර බයිසිකල්වල තියෙන ග්‍රීස් මජං නාගෙන..

ඒ මදිවට ජනූ එයාව විපරම් කරන්ඩ ආව කියල දන්න හන්දම විරිත්තනව එයා දැක්ක ගමන්

බැරිම තැන ඉතිං ජනුත් විරිත්තල ආපහු ආව අම්ම ලඟට

අන්න ඉන්නව බයිසිකලේ කරකව කරකව

හා.... අන්න අර බාල්දිය මෙහෙට කිට්ටු කරන්ඩ චූටි පුතා!!

අම්ම හදන්නෙ අන්තිම සැරේට රෙදි ටික හෝදන්ඩයි. 

අම්මේ!!!

අනේ අම්මේ!!!

අම්මේ!!!

එතකොටම ඇහුන මල්ලි බබා කෑ ගහන සද්දෙ....!!

ජනූ බබාවයි අම්මවයි දෙන්නවම ඇණ තියාගෙන හිටි තැනින් නැගිට්ටු‍නේ එක පාරට

දෙන්නම දුවගෙන ගියේ මල්ලි බබා හිටිය තැනට

බැලින්නං මල්ලි බබා කරකව කරකව හිටිය බයිසිකලේ මල්ලි බබාගෙ ඇඟ උඩට වැටිල..

මල්ලි බබා හූ තියනව!! 

අම්ම එක පාරට බයිසිකලේ කෙලින් කරන්ඩ යනකොටයි ජනූ බබා දැක්කෙ මල්ලි බබාගෙ අතක ඇඟිලි හතරක්ම  බයිසිකලේ චේන්  එකටයි දැති රෝදෙටයි හිරවෙලා කියල..

අම්මේ ... මල්ලිගෙ අත!!!

ජනූ බබාට කෑගැස්සුනා!!

ඒක දැක්කාම නං අම්මට සිහියක් නැති වුණා. දෙතුන් පාරක් දැති රෝදෙ කරකවල බැලුවත් මල්ලි බබා කෑ ගහන හන්ද අම්මට ඒ වෙලාවෙ කරන්නෙ මොනවද කියල හිතාගන්නවත් බැරිවුණ පාර බයිසිකලේ අල්ලගෙන කෑ ගැහුව වත්ත පහල හිටිය අත්තට ඇහෙන්ඩ මහ හයියෙන්

අනේ තාත්තේ!! ඉක්මණට එන්ඩකෝ කියල!!

අත්තේ අත්‍‍තේ!! මල්ලිගෙ අත බයිසිකලේට හිරවෙලා!! ඉක්මණට එන්ඩෝ!!!!

ජනූ බබත් කෑ ගැහුව. කෑ ගහගෙනම වත්ත පහලට දිව්ව අත්තව එක්කන් එන්න...

අම්මගෙ සද්දෙට එන්ඩ හැරුණු අත්තව මගදි හම්බෙලා ජනූ කියපු කතාවට අත්තගෙ ඇස් උඩ ගියා..

ඒ පාර ජනුවත් මග දාල අත්ත දුවගෙන ගියා ගෙයි පිලිකන්නට..

ජනූ බබත් පස්සෙන් දිව්වා!

අනේ තාත්තේ පුතාගෙ අත හිර වෙලා‍නෙ ‍මේ දැති රෝදෙ අස්සෙ.... අනේ මොකද්ද අපි කරන්නෙ??

 

අත්තව දැක්ක ගමන් අම්ම බයෙන් කෑ ගැහුව.. අම්මගෙ ඇස්වලිනුත් කඳුලු ගලනව හෝගාල..

කලබල වෙන්ඩ එපා කලබල වෙන්ඩ එපා .. කියල අත්ත බයිසිකලේ පාමුල ඇණ තියාගත්ත.

මල්ලි බබා දිගටම ඇඬුව.. කඳුලු බේරුණා එයාගෙ මජං ගෑවිලා කලු වෙච්ච කම්මුල් දිගේ!!

  

අනේ එයාගෙ චූටි ඇඟිලි දැති රෝදෙටයි චේන් එකටයි දෙකට හිර වෙලා චප්ප වෙලා ඇති කියල හිතට ආවාම ජනූ බබාට කලන්තෙ වගේ දැණුන...

මල්ලි බබාගෙ අත ගිලගත්ත දැති රෝදෙ හරියට යකෙක් වගේ..!! කුණු දූවිලි ගෑවිලා කලු පාට වෙච්ච යකෙක් වගේ තමයි ජනූට පෙණුනෙ!!

මගෙ පුතා අඬන්නෙ නැතුව ඉන්නකො චුට්ටක්!!

අම්ම බයිසිකලේ අල්ලගෙනම මල්ලිබබාව සනසන්න හැදුව...

අත්ත පොඩ්ඩක් චේන් එකට තට්ටුවක් දාල බැලුව.. රෝදෙ කැරකෙන අත බැලුව..

ඊට පස්සෙ මල්ලි බබාගෙ අත අල්ලගෙන අත්ත කළේ හෙමින් සැරේ චේන්  එක දිගෑරෙන විදියට අනික් පැත්තට පැඩ්ල් එක කරකවපු එකයි. මල්ලි බබා චුට්ටක් කෑ ගැහුව නං තමයි.. 

ඒත් ඉක්මණටම අත දැති රෝදෙන් ගැලවුණා..

අම්ම බයිසිකලේ බිත්තිය පැත්තට තල්ලු කරල මල්ලි බබාගෙ අත බැලුව..

රතු වෙලා තැලිල මිසක් චූටි ඇඟිලි හන්ද මොනවත් වැඩි කරදරයක් වෙලා නෑ...

රෙදි ටික එහෙමම තියෙද්දි වතුර එකක් උණු කරපු අම්ම මල්ලි බබාගෙ අත තෙමෙන්නෙ නැතුව එයාව හෝදවල තැලිච්ච අතේ බෙහෙත් තෙල් ගාල අතගෑව..

මල්ලි බබා බය වෙච්ච පාර වැඩි කතා බහකුත් නෑ..ඉක්මණට බත් කාල අතේ අමාරුවටම වෙන්ඩ ඇති තාත්ත එනකල් හිටියෙත් නෑ.. නින්දත් ගියා..

හොඳ වෙලාවට වැඩි වෙලාවක් අත ඇතුළට යන්ඩ කැරකිලා නැත්තෙ.... නැත්තං එහෙම ආපහු කරකවල ගන්නකොට ඇඟිලි ටික තව තව තැලෙනවනෙ...

තාත්ත ආවාම අත්ත විස්තරේ කිව්වාම ජනූ බබා ගෙ ඇඟ සීතල වෙලා ගියා. අනේ මල්ලි බබාගෙ ඇඟිලිවලට මොනව හරි වුණා නං!!

කොච්චර රණ්ඩු වුණත් මල්ලි බබාගෙ අත බයිසිකලේට අහුවුණ එක ගැන ජනූ බබාට හරි දුකයි..!!

ඒ විතරක් නෙවෙයි..එයාට අර බයිසිකලේ බූ ඇපල් ගහ ලඟ පල්ලමට ඇ‍දගෙන ගිහින් දාන්න තරම් හිතුණ..

ජනූ හෙමින් සැරේ කාමරේට ගිහින් නිදාගෙන ඉන්න මල්ලි බබාගෙ තැලිච්ච අත හෙමීන් අත ගෑව.

එයා හීනෙන්ම කෙඳිරි ගගා පොඩ්ඩක් හිනා වෙනව දැක්කාම තමයි ජනූගෙ හිත හරි ගියේ ඉතිං..

පොඩිබල්ල යන්නෙ එහෙම නෑ මිං මනත බයිසිකල් කරකවන්ඩ...ආයෙ මට අහුවුනොත් නං මං දෙනව හොඳ පාරක්!

තාත්ත කෝ‍ටු හාමි පෙන්නල මල්ලි බබාව හොඳටම බය කරල එයාගෙ බයිසිකල් කැරකැවිල්ලට තහංචි දැම්ම.

ඔන්න ජනූගෙ මල්ලි බබාගෙ වැඩ...!!!

කාලෙකින් ජනූ බබා ආව.. 

කතාවක් අරං එන්න නං ගොඩාක් කල් ගියා තමයි.. 

ඒත් ඉතිං සමා වෙලා කතාව කියෙව්වට බොහොම ස්තූතියි!!

මල්ලි බබාගෙ පින්තූරෙ හම්බ වුණේ මෙන්න මෙතනින්

ජනූ ද මැජික් ගර්ල් සහ මල්ලී ද ගල ගිලපු බෝයි..!!!

මෙන්න බලන්ඩ මං මේ ගල බෙල්ලෙන් දාල කටෙන් ගන්නව!!

කානේශයි,පියුමියි,  ජීවනියි, හිරානුයි, සුරංගයි තව සමීර මල්ලියි නිවාඩු දෙන දවසෙ කලින් ඉස්කෝලෙ ඇරිල අම්මලගෙ ඉස්කෝලෙට පයින් එන අතරෙ බිමට නැවිල ගලක් අහුල ගත්ත සුරංග එයාගෙ සුපුරුදු මැජික් සන්දර්ශනේ පටන් ගත්ත...

ඔන්න මං දැං මේ ගල  බෙල්ල පිටිපස්සෙන් උගුරට දානව

මෙහෙම කියල අත් දෙකම උස්සල බෙල්ල ලඟට අරගත්ත සුරංග ගල බෙල්ල පිටිපස්සෙන් උගුරට දැම්ම....

ඒක දාද්දි එයා වේදනාවෙන් ඇඹරුණා...

ඇත්ත නේන්නං ....! බෙල්ල හිල් කරගෙන ගලක් උගුරට යද්දි කාටද ඉවසං ඉන්ඩ පුලුවං??

ඊට පස්සෙ සුරංග අමාරුවෙන් වගේ දෙතුන් පාරක් එක අතක් නවල කට ලඟට අරන් දෙතුන් පාරක් කැස්ස හන්ද ගල උගුරට ආව කියල තේරුණාම ජනූලගෙ කටවලුත් ඇරුණ....

ඊට පස්සෙ සුරංග ඒ නැවිච්ච අතේ මහපටැඟිල්ල උඩු දත් ඇන්දෙ යට පැත්තෙන් තියල එක පාරටම පැන්නුවම අර බෙල්ලෙන් දාපු ගල කටින් විසිවුණා...!!

ජනූ ගෙ ඇස් අර ගලත් එක්කම අර්ධ කවාකාරව උඩ පහල ගියා!!!

මේක නං ජනූ කොහොම හරි අල්ලගන්ඩ ඕනෙ වැඩක්...

මොකද ඒ දවස්වල ජනූගෙ ප්‍රියතම විනෝදාංශය තමයි ඔය වගෙ ඇස්බැන්දුං මල්ලි බබාට පෙන්නල ඒව කරන විදිය කියල දෙන්නෙ නැතුව එයා අඬන කොට හිනා වෙන එක...

සුරංගගෙ මැජික් එකට හැමෝටම හරිම පුදුමයි!!

ආයෙ කරන්ඩකො!!!

පියුමි කිව්ව...

අපෝ බෑ මැජික් කරන්නෙ එක පාරයි...

සුරංග අගේ පෙන්නුව...

ඒ කොහොමද ඔයා ඒ ගල බෙල්ලෙන් ඇතුළට දැම්මෙ??

ම්හු!! ඒක රහසක් නෙ.. මැජික් කියන එව්ව එහෙම හැමෝටම කියල දෙන්නෙ නෑ... මමත් මේක ඉගෙන ගත්තෙ අපේ දසුන් අයියගෙන්  එයාට ජිල් බෝල දහයක් දීල!!

ඇයි එතකොට අත් දෙකම පස්සට අරගත්තෙ??

මොනව වුණත් ජනූට සැකයි මේ වැඩේ වෙච්ච විදිය නං

ඇයි අත් දෙකම ඕනෙනෙ... නැතුව කොහොමද හම ඇතුලෙන් ඒ ගල රිංගවල බෙල්ල ඇතුලට දාන්නෙ

අනේ.... අනේ අනේ  අනේ අනේ...!

මේ අතරෙ අනිත් අයගෙ සද්දෙ ටික ටික වැඩි වුණාම සුරංග ආයෙම පාරක් මැජික් බලෙන් බෙල්ලෙන් දාපු ගල කටින් අරන් පෙන්නන්ඩ කැමති වුණා!!

හැබැයි ඒ වතාවෙ විමසිල්ලෙන් හිටපු ජනූ දැක්ක සුරංග අත් දෙකම බෙල්ල පිටිපස්සට අරන් බෙල්ල ඇතුලට ගල රිංගවනව කියල කිව්වට ඇත්තටම කරන්නෙ අතේ වැලමිට ලඟ ඇතුල් පැත්තෙ ඒක හංගගන්න එක කියල....

ඊට පස්සෙ බොරුවට ඒ අත කට ලඟට අරන් දෙපාරක් බොරුවට කැහැල අර ඇඟිල්ල පන්නපුවාම වෙන්නෙ අර හංගපු ගල උඩින් විසි වෙලා යන එකනෙ..

ඒක විසිවෙන්නෙ කටෙන්ද කොහෙන්ද කියල ඉතිං එකපාරටම අඳුනගන්ඩ අමාරුයි නෙ කාට වුණත්!!

හරියට හරි!!! දෙන්නං වැඩේ ගෙදර ගිහින්!!

සද්ද නොකර මීය වගේ බලන් හිටපු ජනූ හිතුව

ඊලඟ දවසෙ ජනූල අම්මලගෙ ගමේ ගියා නෙ... ඉතිං මේ මැජික් එක ආයෙ ජනූට මතක් වුනේ ගමේ ගෙදර මිදුලෙ ජම්බු ගහ යට තිබුණු වැලි ගොඩේ මල්ලි බබා එක්ක සෙල්ලං කර කර ඉන්නකොට දැකපු රවුං ගල් කැටයක් දැක්කමයි

මල්ලි... මේ මං ඔයාට මැජික් එකක් පෙන්නන්ඩද??

හා!!!!

මල්ලි බබත් ඒවට නං පැනල එන්නෙ

ඔන්න  මං මේ ගල අරන් බෙල්ලෙන් දාල කට ඇතුලෙන් අරගන්ඩයි යන්නෙ..

ඈ.....??

මල්ලි බබාගෙ ඇස් ජිල් බෝල දෙකක් වගේ වුණා.. .කට ඇරුණ හරියට ජනූගෙ කිඹුල් පැටියගෙ කට වගේ!!

ඊට පස්සෙ වෙච්ච දේවල් ඉතිං අමුතුවෙං කියන්ඩ දෙයක් නෑ.

ජනූ බොහොම පරිස්සමෙන් දන්න ශිල්ප සේරම දාල, රඟපාල ගල් කැටේ බෙල්ලෙන් දැම්ම උගුරට

ඊට පස්සෙ දෙපාරක් කැස්ස...

ඊට පස්සෙ හොඳට හරිබරි ගැහිල එක පාරටම ඇඟිල්ල පැන්නුව දත් ඇන්දට තියල...

උගුරෙන් දැම්ම ගල් කැටේ කට ඇතුලෙන් විසිවෙනව දැක්ක මල්ලි බබා ජනූගෙ පස්සෙන් වැටුණ

ඒක කළේ කොහොමද අක්කෙ??

ආ.... එහෙම කියල දෙන්නෙ නෑ මැජික්!!

අනේ අක්කෙ

අපෝ බෑ....

අනේ!!!

බෑ කිව්වනෙ... කොච්චර කිව්වත් බෑ තමයි

මං අම්මට කියනව එහෙනං ඔයා  එදා නෙස්ටොමෝල්ට් හොරෙන් කෑව කියල..

ආ එහෙම කිව්වොත් ඉතිං කවදාවත්ම කියල දෙන්නෙ නෑ.. අනික මං විතරක් නෙවෙයි නෙ.. ඔයත් කෑවනෙ මීපැනි හොරෙන්...

ඔන්න ඔහොම ඒකෙන් මේකට මේකෙන් ඒකට කතාව මාරු වෙවී ගිහින් අන්තිමට මල්ලි බබා බෑඟිරි ගහ ගහ අඬන්ඩ ගත්ත!!

සද්දෙට ගමේ ආතත් ආව බුලත් කොරටුවෙ වැඩ දාල

ඇයි පුතේ මේ අඬන්නෙ??

අක්ක කියල දෙන්නෙ නෑ මට මැජී................ක්!!!!

මෙන්න මෙහෙ එන්ඩ යන්ඩ... එයාගෙ මැජික් තියාගන්ඩ කියන්ඩ එයාටම...

අන්න බුලත් කොරටුවට මීමින්නෙක් ඇවිල්ල... අපි යං එයාව බලන්ඩ..පොඩි ළමයව අඬවනව මෙතන

ගමේ ආත ජනූට  ඔරවල මල්ලිත් ඇදගෙන ගියා

හැන්දෑකරේ අම්ම ගෙයි ඉස්සරහ පඩියෙ ඉඳගෙන ජනූගෙ කොන්ඩෙ පීරන ගමන් මිදුල කෙලවරේ කරාඹු ගහ ගාව කැරකි කැරකි හොරගල් අහුලන මල්ලි බබා දිහා ඇහැ ගහගෙන උන්න...

අනේ!!! අම්මේ!!!!!!!!!!! ගිලුණා!!! ගිලුණා!!!

එක පාරටම මල්ලි බබාගෙ මහ සද්දෙට අම්ම නැගිටල දිව්ව එයා දිහාට...

කඳුලු පෙරි පෙරී ඔය ඉන්නෙ මල්ලි බබා කරාඹු ගහ යට....

කෝ මොනවද පුතේ ගිලුණෙ??

ගල් කැටේ!!!

හුටා!!! වැඩේ වැරදුණා ජනූට හිතුණ...

දැන් ඉතිං මං කාපං ගුටි!!!

ජනූට අංජනං දේවි පෙන්නුං කළේ ඊලඟ විනාඩි කීපය ඇතුලේ හොඳ රහට කෝටු පාරක් වදින බව තමයි

ඈ...... ගල් කැටයක් ඇයි කටේ දැම්මෙ....

මැජික් පෙන්නන්ඩ......ඇයි අක්ක බෙල්ලෙන් දාල කටෙන් ගත්තෙ ගලක්!!!

මාත් එහෙම කළා!!!

අම්ම ජනූ දිහා රවල බලපු බැලිල්ලට ජනූ ගෙ මූණ ඇද වුණා!!

හරියට වවුලො කාපු කජු පුහුලම වගේ

අද නං ඉතිං ජනූ ගුටි කනව සිකුරුයි!!!

මේ කලබලේ ඇහිල ආච්චි අම්මත් එළියට බැහැපි.. ආතත් ආපි

ආත මල්ලිව කරේ තියන් අඩියට දෙකට පඩිපළ බැහැල ගඟ ලඟට ගියේ ඔරුවට හූ කියන ගමන්මයි....කෙලින්ම ගියේ කරවනැල්ලෙ ඉස්පිරිතාලෙට....

මල්ලි බබා අඬනව දැක්කම, ඒක අහං ඉන්ඩ බැරි තරං විලාපයක් වුණාම නං ජනූට හිතුණෙ

අපරාදෙ මට ඒක මල්ලි බබාට පෙන්නන්ඩයි තිබුණෙ කියල...

හෙට උදේට කක්ක එක්ක පිට වුණොත් හරි.. නැත්තං ආයෙමත් බලන්ඩ වෙනව කිව්ව

නින්දට නැතුව හොරෙන් නිදි වගේ  හිටිය ජනූට අම්ම එහෙම ආච්චි අම්මට කියනව ඇහුණ...

මේ කෙල්ලගෙ වැඩ නෙ... මැජික් පෙන්නන්ඩ කියල මොකක් හරි සුකුරුත්තමක් කරන්ඩ ඇති... ඒක කරන්ඩ ගිහින් තමයි පොඩි එකා ගල කටේ දාගෙන තියෙන්නෙ...

පොඩි එකීට බනින්ඩ ගහන්ඩ එපා... පොඩි වයසෙ ඔහොම තමා!!

‍වෙච්ච සංගදිය දැනගෙන කොළඹ ඉඳන් ගමේ ගෙදර ආපු තාත්ත අම්මට කියනවත් ජනූට ඇහුණ

අනේ මගෙ මල්ලි බබාට මොනව හරි වුණොත්!!

ජනූගෙ ඇස්වලින් කලුවරේම කඳුලු බේරුණා

අනේ ඒ ගල කක්ක එක්ක එලියට එන්ඩ!!!

ජනූ දන්න ගාථා සේරම හිතෙන් මතුරල ප්‍රාර්ථනා කළා

ඊ ලඟ දවසෙ උදේ කක්ක බෙට්ටක් එක්ක එලියට ආපු ජිල්බෝලෙකටත් වැඩිය ලොකු ගල දැකල ගෙදර හැමෝම ප්‍රීති ඝෝෂා පැවැත්තුව

ඔයා මොකටද ගල ගිලින්ඩ ගියේ?? මං ඒ ගල ගිලිනව වගේ පෙන්නුවෙ බොරුවටනෙ.... ඒක මෙන්න මෙතන හංගගන ඊට පස්සෙ නොපෙනෙන්ඩ විසි කරන එකනෙ කරන්නෙ...

ජනූ  ඊට පස්සෙ හොරෙන්ම මල්ලිගෙන් ඇහුව

ඉතිං ඔයා මට කියල දුන්නෙ නෑ නෙ කලිං... මං හිතුවෙ ගල ගටේ දාගෙන තමයි එහෙම විසි කරන්නෙ කියල... අර ඔයා එහෙම බෙල්ලෙන් ගල උගුරට දාල  කැස්සෙ...

ආන්න ඒ වගේ මාත් ඒක කටේ දාල කහිනකොටම ඒක ගිලුණ!!!

මල්ලි කිව්ව

මොකද දෙන්න පුටු පුටු ගාන්නෙ....ඒ පාර මොකක්ද  බෙල්ලෙන් දාල කටිං ගන්ඩ හදන්නෙ??

හැබැයි මීට පස්සෙ නං එක එක එව්ව ගිලල අඬාගෙන එන්ඩ එපා රජෝ...

ඔහොම සුටුස් ගාල එළියට එන එකක් නං කමන්නෑ නැත්තං ඉතිං බඩ පලල තමයි අරගන්ඩ වෙන්නෙ එළියට...

තාත්ත දෙන්නගෙ පයුරුපාසානම දැකල මහ හයියෙන් හිනා වෙවී කිව්ව!!!

ජනූගෙ මැජික් සන්දර්ශනේ ඉවර වුණේ ඔන්න ඔහොමයි!!

අදත් ජනූගෙ පින්තූරෙ සඳහා අනුග්‍රහය මෙන්න මෙතනින්